Andrade, Anna Roxane A. G.
Alden Jerome Mamaril
BSED Filipino 4-1 Oktubre
22, 2014
1.
Panimula
Sa nagdaang mga taon, naging tanyag ang nobela sa buong
mundo. Sumibol ang mga manunulat ng nobela at naging popular sa iba’t ibang
kontinente. Ayon sa kilalang nobelista sa ating bansa na si IƱigo Ed. Regalado,
ang nobela ay isang akdang likha ng guni-guni o maaaring tunay na pangyayari na
ang layunin ay magbigay aliw sa mga mambabasa. Kaya naman marami ang nawiwili
sa pagbabasa nito dahil bukod sa nakakaaliw, hango sa tunay na pangyayari kaya
maaaring kapulutan ng aral.
Sa Japan, isa sa pinakatanyag na nobelista si Haruki
Murakami. Ang kanyang mga likhang nobela ay umani ng maraming parangal mula sa
kanilang bansa pati na rin sa ibang panig ng mundo. Ilan sa mga ito ang World Fantasy Award (2006), Frank O’Connor International Short Story
Award (2006), Franz Kafka Prize
(2009). Nagsasalin rin siya ng mga akdang pampanitikan na nakasulat sa Ingles
patungo sa Niponggo.
Nakagisnan ni Murakami ang Kanluraning kultura partikular
ang musika at literature. Mula pagkabata ay nagbabasa na siya ng iba’t ibang
akda ng mga Amerikanong manunulat tulad nina Kurt Vonnegut, Richard Brautigan,
at Jack Keruac. Ito ay nakaimpluwensya sa estilo ng pagsulat ni Murakami.
Nagsimula siyang magsulat noong dalawampu’t siyam na
taong gulang . Aniya, “Hindi talaga ako nagsusulat, isa lamang akong
ordinaryong tao, nagpapatakbo ng isang club at hindi talaga ako lumilikha ng
anumang akda”. Isinulat niya noong 1979 ang kanyang kauna-unahang nobela, ang Hear the Wind Sing. Naging inspirasyon
niya sa pagsulat nito ang napanood na laban ng baseball. Noon niya naunawaan na kaya pala niyang sumulat ng
nobela. Mahabang panahon ang ginugol niya sa pagsulat at nang matapos, inilahok
niya ito sa isang patimpalak. Hindi siya nabigo dahil nagkamit ito ng unang
karangalan. Nahikayat si Murakami na magsulat pa ng nobela dahil sa nakamit na
tagumpay. Sa mga sumunod na taon, patuloy siyang umani ng mga parangal.
Ang nakamit na mga pagkilalang ito ay patunay kung gaano
kahusay na nobelista si Murakami. Napagpasyahan kong suriin ang isa sa mga
nobela niya, ang Sputnik Sweetheart upang masipat ang katangian ng mga tauhan,
estilo ng paglalahad at iba pang elemento nito. Karagdagan pa, naniniwala akong
mainam na masuri ang katha ng isang tanyag na manunulat upang malinang ang
kritikal na pag-iisip ko bilang mag-aaral at bilang guro sa hinaharap.
1.1
Maikling Buod
Si K, ang tagapagsalaysay ay isang guro. Umiibig siya kay
Sumire na isang manunulat. Samantala, si Sumire naman ay may gusto sa amo niya,
si Miu. Naging magkatrabaho sina Miu at Sumire, bahagi ng kanilang trabaho ang
paglalakbay sa iba’t ibang bansa. Napagpasyahan nila na magbakasyon sa Gresya.
Ipinagtapat niya ang kanyang pag-ibig kay Miu ngunit dahil sa nakaraan ni Miu,
hindi niya kayang suklian ang pagmamahal nito. Umalis si Sumire, labis na
nag-alala si Miu kaya tinawagan niya si K upang pumunta doon. Sa pamamalagi
doon ni K, binasa niya ang dalawang dokumento na ginawa ni Sumire. Naliwanagan
siya sa mga nalaman niya. Hindi nagtagal, nagdesisyon siyang bumalik ng Japan.
Matagal niyang hinintay ang pagbabalik ni Sumire, hanggang makatanggap siya ng
tawag mula rito. Malapit daw siya sa tinitirahan ni K, ngunit hindi niya sinabi
ang eksaktong lokasyon.
1.2
Layunin
Ang bawat akdang pampanitikan ay nararapat na bigyang
pagpapahalaga. Tiyak na pinaghirapan at pinag-isipang mabuti ng may-akda ang
mga elemento ng kanyang katha. Mahalagang malaman ng mga mambabasa ang mga
tauhan, mga pangyayari at iba pang bagay na may kaugnayan sa nobela. Kaya naman
makikita sa papel na ito ang pagsusuri ng nobelang Sputnik Sweetheart ni Haruki
Murakami gamit ang ikalawang balangkas mula kay Propesora Nenita Papa. Ito ang
pinili ko dahil angkop ang balangkas upang masuri ang iba’t ibang aspekto ng
isang nobela.
1.3 Balangkas Teyoretikal
Nakasalig sa teoryang
siko-analitiko ang balangkas na ito. Ipinakilala ni Sigmund Freud ang teoryang
ito. Ipinapakita ng dayagram sa itaas na maraming salik na nakaaapekto sa
pagkilos ng isang tao tulad ng karanasan ng pagkabata, pagiging inosente, sexual at aggressive drives pati na rin ang defense mechanism.
2.
Pagsusuri
I.
Sputnik Sweetheart ni Haruki Murakami
II.
Buod
Si Sumire ay naghahangad na maging manunulat, ang
tagapagsalaysay at protagonista sa nobela, si K. Si K ay isang guro sa
elementarya, dalawampu’t limang taong gulang at may gusto kay Sumire kahit pa
hindi niya ito ipinagtapat. Sa kasalan, may nakilala na Koreana si Sumire, si
Miu. Siya ay mas matanda sa kanya ng labimpitong taon. Nagkausap sila at
naramdaman ni Sumire na parang nahuhulog na ang loob niya sa babaeng nakilala.
Ito ang unang pagkakataon na nakaramdam siya ng pagnanasa sa ibang tao. Nang
magtagal, niyaya ni Miu si Sumire na magtrabaho para sa kanya at pumayag naman
si Sumire. Magmula noon ay kapansin-pansin ang pagbabago ni Sumire: nagsusuot na siya ng magagarang
damit, nagkaroon ng magandang tirahan at tumigil sa paninigarilyo.
Hindi nakakalimot si Sumire na sulatan si K. Kahit nasa
ibang bansa ay nagpapadala pa rin siya ng mga liham upang makibalita. Dahil sa
mga liham, natutukoy ni K kung nasa anong
lugar na ang paglalakbay nina Miu at Sumire dahil sa pag-aasikaso sa
negosyo. Sa huling liham na ipinadala ni Sumire, binanggit niyang magbabakasyon
sila ni Miu sa isang isla sa Gresya. Hindi nagtagal, tumawag si K upang malaman
kung kailan siya babalik ngunit hindi sila nagkausap, ang narinig lamang niya
ay ang sagot mula sa makina.
Isang
araw , nakatanggap si K ng tawag mula kay Miu. Inutusan siya nitong pumunta sa
lugar na kinalalagyan nila dahil may nangyari kay Sumire. Hindi na masyadong
nagpaliwanag si Miu, ang malinaw lamang ay kailangan niyang makarating sa
lalong madaling panahon. Mahina ang signal at kaagad na naputol ang tawag.
Magsisimula na ang panibagong taong pang-akademiko nang
panahong tumawag si Miu. Alam niya kung gaano kahalagang makapagturo siya sa
mga bata ngunit pinili niya si Sumire. Nang sumunod na araw ay umalis na siya. Iyon
ang unang pagkakataon na nakaharap niya si Miu. Kaagad niyang ipinagtapat kay K
na nawawala si Sumire. Nagkuwento si Miu sa
mga naunang pangyayari at iniisip niyang mabuti kung ano nga ba ang
dahilan ng pagkawala ni Sumire. Sa kabilang banda, natutuwa si Miu sa pagdating
ni K, ngunit nag-aalala pa rin siya kay Sumire na baka nagpakamatay ito. Sinabi
naman ni K na hindi siya ganoong uri ng tao na magagawang tapusin ang kanyang
buhay. Umalis si Miu at pumunta ng Athens upang humingi ng tulong sa embahadang
Japan at matawagan ang mga magulang ni Sumire. Nanatili si K sa islang iyon at
patuloy na iniisip ang kanyang minamahal. Naalala niya ang sinabi ni Miu
patunkol sa dokumento na isinulat ni Sumire. Kaagad niyang hinanap ang
kompyuter ni Sumire at ang diskette na
naglalaman ng dalawang dokumento. Ang una ay naglalahad patungkol sa ikinuwento
ni Miu sa kanya kung anong pangyayari ang nakapagpabago sa kanya labing-apat na
taon na ang nakalilipas. Inunawa niya ang mga nakasulat doon at naisip niyang
marahil ay umalis siya dahil may gusto siyang hanapin. Nang gabing iyon ay
nagkaroon siya ng kakaibang karanasan sa kanyang pamamasyal sa isla. Bumalik si
Miu sa islang iyon makalipas ang ilang araw. Nagdesisyon si K na umalis sa
lugar na iyon kahit pa maganda naman ang pakikitungo sa kanya ni Miu. Bumalik
siya sa Japan at ipinagpatuloy ang pang-araw-araw na buhay. Dahil sa pagkawala
ni Sumire, pakiramdam niya’y nawala rin ang pinakamahalagang bagay sa buhay
niya.
Muli siyang nakatanggap ng tawag, ito’y mula sa kanyang
nobya na ina ng isa sa kanyang mga estudyante. Sinabi niya na ang kanyang anak
na si Carrot ay nahuling nagnanakaw sa isang pamilihan. Nagpapatulong siya kay
K na hikayatin ang guwardiya na pakawalan ang anak niya at huwag nang
nagsumbong sa mga pulis. Nahirapan magdesisyon ang guwardiya dahil hindi
nagpakita ng anumang pagsisisi ang bata sa nagawa niyang krimen at dahil na rin
sa biglang pagsulppot ni K. Matapos ang mahabang pag-uusap sa pagitan ng
guwardiya at ni K, pinakawalan din ang batang si Carrot. Pinauwi na niya ang
kanyang nobya, naiwan sa kanya si Carrot at nagpunta sila sa isang kapehan.
Hindi nagsalita ang bata sa mga oras na magkasama sila. Gayunpaman, ikinuwento
niya ang tungkol kay Sumire. Pagkatapos ay iniuwi na niya ito sa kanyang ina at
sa pagkakataong iyon ay nakipaghiwalay siya sa nobya at sinabing iyon na ang
huli nilang pagkikita. Nagpatuloy siya sa buhay nang mag-isa. Makalipas ang
mahabang panahon, muli niyang nakita si Miu lulan ng isang sasakyan ngunit
hindi siya nito napansin. Matagal na naghintay si K sa pagbabalik ni Sumire,
hanggang isang araw tumawag ito sa kanya. Medyo nagtampo si Sumire sa isinagot
ni K. Nagtanong siya kung nasaan ito ngunit hindi siya sumagot, sa halip
nangako lamang ang si Sumire na tatawag siya ulit.
III.
A. Uring Pampanitikan
Ang
Nobela bilang akdang pampanitikan
Ayon kay Mayos (2009), ang nobela ay
isang akdang pampanitikan na nagtataglay ng maraming ligaw na tagpo. Tinatawag
din itong katham-buhay. Katha sapagkat hinabi ang panulat. Nilikha ito ng
manunulat ayon sa kanyang pananaw na
dapat na maging anyo ng paksang tinatalakay. Buhay naman sapagkat ang
isinasalaysay ay batay sa mga tunay na pangyayari. Maaaring sinaliksik o mula
sa panayam ng isang tao ang mga inilalahad.
B. Estilo ng Paglalahad
Ang manunulat ay pumili ng estilo na
angkop sa daloy ng pangyayari sa kuwento. Ang nobela ay gumamit ng unang
panauhan sa paglalahad ng pangyayari. Ito ay isang malaking hamon para sa isang
manunulat kung paano niya maihahatid nang malinaw ang bawat mensahe. Pagkatapos
kong mabasa ang nobelang ito, walang duda na mahusay na naipakita ni Murakami
ang kanyang galling sa pagsulat. Nangangailangan ng pokus at pag-iisip upang
lubos na maunawaan ang kuwento.
Ito ay kuwento ng pag-iibigan na
umiikot sa tatlong pangunahing tauhan sa
kuwento; una, ang tagapagsalaysay na umiibig sa ikalawang karakter na si Sumire
at si Miu na siya namang gusto ni Sumire. At ang mas nagpatingkad sa kuwento ay
ang pag-ibig na nararamdaman ng karakter na babae sa kapwa niya babae. At dahil
ang estilong ginamit ay pagsasalaysay ng isa sa mga pangunahing tauhan, habang
nagkukuwento siya ng kanyang buhay, inilalahad niya rin ang buhay ng dalawa
pang karakter. Ngunit lagi pa rin nating alalahanin na iisang tao lamang ang nagkukuwento
at iyon ay si K.
Habang tumatagal ang aking
pagbabasa, paganda nang paganda ang pangyayari at nagkakaroon ng tanong sa
isipan ng mambabasa kung ano nga ba ang nagaganap sa buhay ng bawat karakter.
Sa huli, ang mambabasa ang magpapasya kung ano-ano sa mga inilahad ang totoo at
alin ang hindi totoo.
Sa kabilang banda, maaaring
magkaroon ng maling kongklusyon ang mambabasa dahil na rin sa estilong ginamit
ng manunulat, kaya kailangan nating magpokus upang maunawaan nang mabuti ang
kuwento.
C. Mga Tayutay
1. Simile o Pagtutulad- ito ay hindi
direktang paghahalintulad ng dalawang magkaibang tao, bagay, hayop o
pangyayari. Gumagamit ng mga salitang parang, katulad ng, kaparis ng, tila at
iba pa.
Mula
sa kuwento: Si Sumire ay naglaho na parang usok.
Paliwanag:
Inihalintulad ang pagkawala ni
Sumire sa usok. Alam naman natin na ang usok ay mabilis maglaho. Si Sumire ay
bigla na lamang umalis dahil sa labis na kalungkutang dulot ng pagtanggi ni Miu
sa kanya. Walang nakakaalam kung saan siya nagpunta kaya alalang-alala sa kanya
sina K at Miu.
2. Metaphor o Pagwawangis- ito ay tiyak at
direktang paghahambing ng dalawang magkaibang bagay. Hindi na gumagamit ng mga
salitang tulad, parang, at iba pa.
Mula
sa kuwento: Ang katotohanan ay paglagpas sa isang linya at isang kasuotang
hindi tugma ang pagkakabutones.
Paliwanag:
Direktang inihalintulad ang
katotohanan sa paglagpas sa isang linya at sa kasuotang hindi tugma ang
pagkakabutones. Hindi natin makikita ang katotohanan kung hindi tayo lalabas sa
ating “comfort zone”. At kung minsan
ang katotohanan ay hindi naaayon sa ating kagustuhan. May mga pagkakataong
malulungkot tayo dahil sa mga nangyari ngunit huwag sana tayong panghinaan ng
loob bagkus ito ang maging inspirasyon natin upang maging matatag sa pagharap
sa mga hamon ng buhay.
D. Sariling Reaksyon
1. Pananalig Pampanitikan/Teorya
Teoryang Siko-Analitiko
Sa teoryang ito, may malaking
impluwensya ang pahayag ni Freud na tanging ang ekonomiya lamang ang motibo ng
lipunan. May kinalaman ito sa paniniwalang naghahanap-buhay tayo upang lasapin
ang sarap ng buhay at nagkakaroon lamang ng maturidad ang isang tao bunga ng
kanyang kamalayan sa kahirapan.
Tinatalakay rin ang mga damdaming
namamayani sa mga tauhan gaya ng pagmamahal, paghanga, pagdakila, gayon din ang
mga negatibong damdamin ng pangamba, takot, pagkabigo at iba pa.
Paraan ng Pagsusuri:
1. Kahalagahan ng mga karanasan nang pagkabata
Paliwanag:
Labis na trauma o pagkatakot na
muling magmahal ang nadama ni Miu nang siya ay lumaki. Ito ay dahil sa kanyang
naging karanasan noong bata pa. Nakulong siya sa ferris wheel at mula sa tuktok, tanaw niya ang bahay na tinutuluyan
niya. Takang-taka siya nang makita ang sarili na nandoon at nakikipagtalik sa
isang lalaki samantalang nakasakay siya sa ferris
wheel sa mga sandaling iyon. Binanggit din sa kuwento na nagkaroon ng
maraming kasintahan si Miu noong bata pa siya at sa edad na labimpito, hindi na
siya birhen. Ang mga kaganapang ito ang nagbunsod kay Miu na matakot umibig
muli. Ginawa niyang puti ang kanyang buhok upang makaiwas na magustuhan siya ng
kalalakihan. Patunay lamang ito na malaki ang papel ng nakaraan sa paghubog ng
ating pagkatao sa kasalukuyan.
2. Ang pagiging inosente o walang
muwang, sexual at aggressive drives
Paliwanag:
Nagpakita
si Sumire ng pagiging emosyonal sa pagdedesisyon. Pinili niyang sumama kay Miu
dahil gusto niyang mapalapit dito. Ang hindi niya alam, takot na magmahal si
Miu kaya kahit ano ang gawin niyang pagsisikap, hinding-hindi siya nito
mamahalin.
Ipinakita niya rin ang kanyang
pagnanasa at pagiging agresibo. Pahiwatig na gusto niyang makipagtalik. Sa
kasamaang palad, tumanggi si Miu.
Nasaktan si Sumire at lumayo na lamang upang makalimot.
3. Ang defense
mechanism at kung bakit ang bawat indibidwal ay magkakaibang kumikilos sa
bawat sitwasyon
Paliwanag:
Sa parte ni Miu, pinrotektahan niya
ang kanyang sarili sa mga kalalakihan sa pamamagitan ng pagpapakulay ng puti sa
kanyang buhok. Ito ang kanyang ginawa dahil sa takot na kanyang naramdaman mula
nang siya ay bata pa. Nagdesisyon siya na huwag nang umibig muli.
Sa parte naman ni Sumire, ang
kanyang emosyon ang nagdidikta sa mga ikinikilos niya. Pinili niyang magtrabaho
kay Miu upang mapalapit dito at hindi na niya ipinagpatuloy ang pangarap na
maging manunulat. At nang minsang magkasarilinan silang dalawa ni Miu, hindi
niya napigilan ang pagnanasa at naging agresibo siya sa kama. Nang tumanggi si
Miu sa gusto niya, nasaktan siya nang husto at umalis nang walang paalam.
Mas nangibabaw naman kay K ang
kanyang pag-iisip. Hindi niya pinairal ang pag-ibig kay Sumire at sinuportahan
niya na lang ang kagustuhan nito. Sa bandang huli ng kuwento, nagdesisyon
siyang makipaghiwalay sa kanyang kasintahan. Ipinakita niyang nasa hustong
pag-iisip siya at alam niya na mali ang makipagrelasyon sa ina ng kanyang
estudyante.
2. Mga Pansin at Puna
a.
Mga Tauhan
·
K
Siya ay kaibigan ni Sumire.
May gusto siya kay Sumire ngunit hindi siya nagtapat ng kanyang nararamdaman
dahil alam niyang si Miu ang gusto ni Sumire.Sinuportahan na lang niya ang mga
desisyon ni Sumire. Positibo ang katangiang ipinakita ni K mula umpisa hanggang
matapos ang kuwento. Nang malaman niyang nawawala si Sumire sa islang
pinuntahan nila ni Miu, kaagad siyang pumunta doon upang tumulong sa
paghahanap. Nang masangkot ang kanyang estudyanteng si Carrot sa nakawan sa
isang pamilihan, pumunta siya upang makipag-areglo sa guwardiya. Hindi niya
hinusgahan ang bata, sa halip inunawa niya ang kalagayan nito. Naipakita rin ni
K na siya ay nasa hustong pag-iisip. Sa huli ay nakipaghiwalay siya sa kanyang
kasintahan na ina ng kanyang estudyante dahil alam niyang hindi tama ang
kanyang ginagawa. Pinili na lamang niyang mamuhay nang mag-isa.
·
Sumire
Isa siya sa mga pangunahing
karakter at may gusto sa kapwa niya babae, si Miu. Masasabi kong padalos-dalos
sa pagdedesisyon si Sumire. Nangangarap siyang maging manunulat ngunit hindi
siya nagtuloy dahil pinili niya na makasama ang kanyang minamahal na si Miu.
Tila hindi niya pinag-iisipan nang mabuti ang ginagawa, basta kung ano ang
gusto niya, iyon ang sinusunod niya. Dumating sa puntong, hindi na niya
napigilan ang sarili. Isang gabi ay sinunggaban niya si Miu at gusto niyang may
mangyari sa kanila ngunit tumanggi si Miu. Labis na nasaktan si Sumire sa
nangyari kung kaya’t umalis ito nang walang paalam. Biglaan na naman ang
kanyang desisyon. Hindi niya inisip na may mga taong lubos na nag-aalala sa
kanyang paglisan.
·
Miu
Siya ang babaeng minamahal ni Sumire.
Nakakalungkot nga lang dahil takot na ito magmahal. Ito ay dahil sa sumusunod
na pangyayari. Napanaginipan niyang nakulong siya sa ferris wheel, nakita niya
ang kanyang sarili na nakikipagtalik sa isang lalaki. Simula noon, naramdaman
niyang parang kulang ang kanyang pagkatao at hindi na rin siya muling umibig.
Natuwa ako kay Miu dahil hindi niya pinatulan si Sumire. Labag sa mata ng Diyos
at ng lipunan na makipagrelasyon sa kapwa babae. At nang umalis si Sumire,
kaagad siyang tumawag kay K upang humingi ng tulong at mahanap ang kaibigan.
Ipinakita niya na mahala si Sumire at nag-aalala siya sa kalagayan nito.
b.
Galaw ng Pangyayari
Mabilis
at maayos ang galaw ng mga pangyayari. May mga parte ng lamang na puro
pahiwatig ang inilalahad kaya nag-iiwan ito ng tanong sa aking isipan. May
pangyayaring tila hindi totoo o pantasya lamang gaya ng nakita ni Miu ang
kanyang sarili na nakikipagtalik sa isang lalaki. Nakakasorpresa ang ibang pangyayari
at ang iba’y parang walang kaugnayan sa kuwento, ngunit sa huli mauunawaan mo
na ang bawat inilahad ay magkakaugnay. May mga rebelasyon na hindi mo aakalaing
iyon pala ang naganap, tulad ng nakaraan ni Miu at ang hindi napagbigyang nais
ni Sumire na makatalik si Miu. Ang lahat ay natuklasan ni K dahil sa dokumento
na nakalagay sa kompyuter ni Sumire.
Nagustuhan
ko ang sinulat ni Haruki Murakami. Napag-isip ako ng nobelang ito. Medyo nalito
ako sa kalagitnaan ng pagbabasa dahil na rin sa estilo ng manunulat, ngunit sa
huli ay naunawaan ko rin naman.
3.
Bisang Pampanitikan
a.
Bisa sa Isip
Tumatak
sa aking isipan ang katangian ng bawat karakter. Ipinakita sa kuwento kung
paano nakaapekto ang kanilang emosyon sa pagdedesisyon nila sa buhay. Nararapat
na balansehin nating ang ating sarili, huwag puro emosyon ang pairalin. Gaya ni
Sumire, gusto niyang maging isang manunulat ngunit hindi niya itinuloy dahil
mas pinili niyang magtrabaho kasama ang iniibig niyang si Miu. Dapat ay
itinuloy niya ang kanyang pangarap lalo na’t hindi naman siya nakasisiguro na
kapag sumama siya kay Miu, may maganda itong kalalabasan. Sa bandang huli,
nabigo rin naman siya at piniling lumayo upang malimot ang kanyang dinaramdam.
Malaki ang papel ng nakaraaan sa
kasalukuyan. Katulad ni Miu, nadala na siya makipagrelasyon dahil sa nangyari
noong siya ay bata pa. Kung kaya, ang kanyang buhok ay pinakulayan ng puti
upang maiwasang magustuhan siya ng mga lalaki. Patunay lamang ito na malaki ang
epekto ng mga nakaraang pangyayari sa paghubog ng ating pagkatao sa
kasalukuyan.
b.
Bisa sa Damdamin
Nakakalungkot
isipin na hindi lahat ng pag-ibig sa mundo ay nasusuklian. Katulad ng pag-ibig
ni Sumire kay Miu, isinakripisyo pa naman ni Sumire ang kanyang pangarap na
maging manunulat ngunit hindi naging sulit ang ginawa niyang sakripisyo. Hindi
rin siya naging masaya o sa madaling sabi, nabigo siya, dahil ang babaeng
kanyang inibig ay takot nang magmahal. Humanga ako sa pagpapahalaga ni K kay
Sumire. Pumunta siya agad ng Greece nang malamang nawawala ito. Kahit alam
niyang hindi naman nito masusuklian ang lihim niyang pagtingin, hindi siya
nag-alinlangan na tumungo doon upang tumulong sa paghahanap.
c.
Bisa sa Kaasalan
Tama ang
ginawang desisyon ni K na makipaghiwalay sa kanyang kasintahan. Hindi
kaaya-ayang tingnan na ang isang guro ay nakikipagrelasyon sa ina ng kanyang
estudyante. Sa ating lipunan, hindi katanggap-tanggap ang ganitong sitwasyon.
Nakakatuwa
ang ipinakitang ugali ni K sa kanyang estudyanteng si Carrot na sa kabila ng
kamalian nitong nagawa, hindi siya nanghusga bagkus inunawa niya ang damdamin
niyo. Sa kabilang banda, humanga ako sa ginawang paglilihim ni K ng kanyang
nararamdaman para kay Sumire. Kahit pa sa sabihing si Miu ang gusto ni Sumire,
hindi naman umabot sa puntong naging mas malalim ang naging ugnayan nila ngunit
pinili niya pa ring kimkimin ang kanyang pagtatangi at sinuportahan na lang
niya si Sumire kung kanino ito masaya.
d.
Bisa sa Lipunan
Isapuso
at isaisip natin ang aral ng kuwentong ito. Sa buhay pag-ibig, hindi laging
masaya. Minsan luluha rin tayo at masasaktan. Kailangan natin ito tanggapin
dahil parte ito ng buhay. Huwag nga lang sana tayo magdesisyon kapag tayo ay
sobrang lungkot dahil maaari tayong magkamali sa ating ginagawa. Hindi dapat
mangibabaw ang emosyon sa ating buhay. Dapat balanse ang pag-iral ng emosyon at
pag-iisip nang sa gayon ay matimbang natin kung ano ang tama at mali. Kapag
gagawa tayo ng hakbang, isipin din natin yung mga taong nasa paligid natin. Ano
kaya ang mararamdaman nila? Matutuwa ba sila? Masasaktan ba sila? Huwag puro
sarili ang isipin sapagkat hindi tayo nabubuhay para lamang sarili, nabubuhay
din tayo para sa ibang tao.
3. Lagom at Kongklusyon
Hindi naging masaya ang tatlong
karakter sa kanilang buhay pag-ibig. Si K na matagal nang minamahal si Sumire
ay hindi kailanman nagkaroon ng lakas ng loob na magtapat. Nakuntento na lamang
siya na suportahan ang minamahal sa nais nitong mapalapit kay Miu. Sumama si
Sumire kay Miu sa pag-asang mas mapalalim pa ang ugnayan nila ngunit nabigo
siya dahil takot na muling umibig ang babaeng minamahal niya. Katulad ni K at
Sumire, hindi rin naging masaya si Miu dahil nabuhay siya kalakip ang takot na
naramdaman mula ng siya’y bata pa.
Maraming simbolo at pahiwatig na
inilahad sa kuwento na talaga namang hahamon sa kritikal na pag-iisip ng
mambabasa. Dahil sa mga pahiwatig na ito, nalaman ko kung bakit Sputnik
Sweetheart ang pamagat ng aking binasa. Inihalintulad ang pagkakakilala nina
Miu at Sumire sa sasakyang pangkalawakan na ito. Saglit lamang silang
nagkasama, parang Sputnik na dumaan lamang ng ilang Segundo, pagkatapos ay muli
nilang daranasin ang pag-iisa.
May taglay ring aral sa buhay ang
kuwentong ito. Hindi dapat magpadalos-dalos sa pagdedesisyon dahil hindi ito
magbubunga nang mabuti. Kilalanin muna natin ang taong paglalaanan natin ng
pag-ibig. Alamin ang kanyang pinagdadaanan, saloobin at pananaw nang sa gayon
hindi tayo magtaka sa kanyang mga ikinikilos.
Sa pangkalahatan, napakahusay ng
pagkakasulat ni Haruki Murakami sa nobelang ito. Kakaiba ang kanyang estilo,
puno ng pahiwatig at simbolismo ang bawat pahayag, may halong pantasya ang
ilang pangyayari, kapana-panabik ang bawat tagpo at kapupulutan ng aral sa
buhay.
Sanggunian:
Chug,
C. M. (2013). Mga Tayutay. Powerpoint Slides]. Halaw sa http://www.slideshare.net
Maikling
Talambuhay, Estilo, at Parangal na Natanggap ni Haruki Murakami. Halaw sa http://en.wikipedia.org/wiki/Haruki
Maslog,
C. C. (2008). Teoryang Siko-Analitiko.
Panunuring Pampanitikan, 19-20.
Mayos,
N. M. (2009). Ang Nobela Bilang Akdang Pampanitikan. Nobela at Maikling Kuwento,
25-30.
Sputnik
Sweetheart. PDF. Halaw sa http://literatori.files.wordpress.com/2013/08/sputnik-sweetheart.pdf
Villafuerte,
P. V. Balangkas ng Pagsusuri. Panunuring
Pampanitikan, 22-24.